1588. Полацкія казакі

Па смерці архіепіскапа Феафана (Багдана Рыпінскага) ў жніўні 1588 года, полацкім архіепіскапам стаў Афанасій Цярлецкі. Для новага ўладыкі быў злажан вопіс усіх архіепіскапскіх маёнткаў у Полацкім павеце. Шляхціц Фёдар Гадэбскі з некалькімі памагатымі паехаў да вёсак, належачых архіепіскапіі, каб зрабіць інвентар маёмасці, “дымоў” і падаткаў. Але нечакана для Гадэбскага (і нажаль для нас) нічога ў яго не атрымалася ў Дольцах і Весніцку, бо яму гэтага не дазволіў нехта Станіслаў Бароўскі, які ахоўваў гэтыя маёнткі і збіраў з іх даніну ад імя Полацкага ваяводы. Зноў, як і амаль сто гадоў да гэтага, маёнткі аказаліся спрэчнымі.

Цікавы факт тут – гэта тое, што дапамагалі Бароўскаму бараніць гэтыя вёскі казакі, якія там прысутнічалі, па словах Гадэбскага, у вялікай колькасці і “съ розными бронями, до бою належачыми”.

Казакі з’явіліся у ВКЛ у канцы XIV стагоддзя. Па іх дапамогу ў абароне сваіх земляў, замкаў, гарадоў і маёнткаў звярталіся князі і шляхта. Казакі прымалі ўдзел у Лівонскай вайне на баку ВКЛ і дапамагалі вызваляць Полацк. Мабыць, гэта былі тыя з казакаў, што засталіся пасля Лівонскай вайны на службе ў Полацкага ваяводы.

Чытаем у Баркулабаўскім летапісе:

Року 1590, были козаки запорозкие Матюша с полком, Голый с полком, у Могилеве аж до Минска приставъство по волостях брали, а кривды шкоды не чинилы, толко жонок охочих, тых намовляли и заклинали, абы з ними на низ ишли, и взяли з собою жонок и девок, яко двесте поголов.

1588 г. Декабря 13. Увязчій (вводный) листъ дворянина Годебскаго епископу Полотскому Афанасiю Терлецкому, на владѣніе имѣніями архіепископіи, съ инвентаремъ. //Археографический сборник документов относящихся к истории северозападной Руси. Т.1

Я, Ѳедоръ Кгодебскій, дворянинъ его королевское милости, сознаваю тымъ моимъ увяждчымъ листомъ, ижъ, за посланьемъ и листовнымъ росказаньемъ его королевское милости пана моего милостивого, на поданье имѣней, добръ владычеству Полоцкому, Витебскому и Мстиславскому належачыхъ, велебному въ Бозѣ его милости Архіепископу владыцѣ Полоцкому, Витебскому и Мсти­славскому киръ Афтанасію Терлецкому, за даниною оному отъ короля его ми­лости, тогды въ року теперешнемъ тисяча пятьсотъ осмъдесятъ осмомъ, мѣсеца Декабря третего дня, будучы мнѣ тутъ у Полоцку, въ замку вышнемъ Полоцкомъ, у дому намѣстника Полоц­кого, пана Якуба Семашка, пры отправованью на онъ часъ рочковъ кгродскихъ, а маючы пры собѣ возного земли Полоцькое, именемъ Деменьтея Про­коповича, отъ тогожъ пана Якуба Се­машка, намѣстника Полоцького, зъ ураду прыданого, и сторону шляхту лю­дей добрыхъ, и напервѣй показываломъ передъ паномъ намѣстникомъ и передъ немало людьми добрыми шляхтою, обывательми воеводства Полоцького, кото­рые на тотъ часъ при врадѣ были, прывилей данину его королевское милости, на тую архіепископію Полоцькую верхопомененому его милости архіеписко­ пуданый. Показываломъ тежъ два ли­сты его королевское милости, то естъ: одинъ листъ до всихъ обывателей вое­водства Полоцького, а другій листъ до его милости пана воеводы Полоцького писаные, въ которыхъ писати его ко­ролевская милость росказати рачылъ, абы такъ ихъ милость, панове обыватели земли Полоцькое, яко тежъ и его милость панъ воевода, о томъ вѣдаючы воли его королевское милости, въ томъ противни не были. Подаломъ тежъ до пана намѣстника листъ отворыстый отъ его милости пана воеводы По­лоцького до него писаный, въ ко­торомъ его милость писать росказати рачылъ, абы онъ вси имѣнья и пожит­ки , владычеству Полоцькому належачые, такъ, яко то зошлый архіепископъ Полоцькій, небожчыкъ отецъ Ѳеофанъ Богданъ держалъ, черезъ мене, послан­ца его королевское милости, тому архіе­пископу теперешнему отцу Афтанасію Терлецкому въ моцъ и вжыванье подавати не заборанялъ. Которые листы его королевское милости передъ урадомъ и передъ всими паны шляхтою, которые на онъ часъ были, чытаны. А по прочытанью тыхъ листовъ, панъ на­мѣстникъ, не хотечы на онъ часъ чытать вслухъ передъ всими людьми ли­сту пана воеводиного, до него писано­го, взявшы его отъ мене, до дня тре­тего на отказъ мнѣ съ того листу, то естъ, сегожъ мѣсеца Декабра пятого дня, отложылъ. Вѣдь же я домагаломъ ся того, абы тотъ листъ его милости пана воеводинъ до книгъ кгродскихъ Полоцькихъ слова отъ слова вписанъ, а мнѣ выписъ съ книгъ выданъ былъ. На што панъ намѣстникъ позволившы, тотъ листъ до книгъ кгродскихъ впи­сати казалъ, а мнѣ выписъ подъ пе­чатью его и съ подписомъ руки писара кгродского Полоцького, пана Миколая Подборского, одъ нихъ выданъ естъ. И кгды тотъ пятый день мѣсеца Декабра прыпалъ, тогды панъ намѣстникъ, не кончечы тое справы со мною, зложылъ ми еще рокъ до дня третего, сего мѣсеца Декабра семого дня, давшы того прычыну, ясе дей безъ ознайменья ихъ милости пановъ шляхты, а меновите пану Есифу и пану Андрею…. Рыпиньскимъ, сыномъ владыки зошлого Полоцького, и иншымъ паномъ шляхтѣ, кото­рые сполне со мною церковъ Светое СоФеи печатовали: отказу и становенья скутечного, вашмостю пане Кгодебскій, чынити не могу, а такъ будь дей вашмость до того дня терпливымъ. А кгды тотъ день семый мѣсеца Декабра прыпалъ, домагаломъ ся у пана намѣстни­ка, абы имѣнья и вси добра, къ вла­дычеству Полоцькому прыслухаючые, въ воеводствѣ Полоцькомъ лежачые, то­ му, кому то належыть, черезъ мене подаваны были, и абы се онъ водлугъ листу его милости пана воеводиного заховуючы, воли его королевское милости ни въ чомъ противенъ не былъ. На то панъ намѣстникъ повѣдилъ: готовъ дей есми росказанью его милости пана мое­го досить чынити, ино ясе дей перьвѣй вашмость озми отъ мене зъ завѣданья церковъ Светое СоФеи зъ скарбами церковными, тутъ у замку выш­немъ Полоцкомъ, тогды дей и вси имѣнья, владыцѣ належачые, вашмость подавати будешъ. А ямъ, ему на то от­казъ чинечы, повѣдилъ тыми словы: кгды отецъ владыка не будетъ мѣть за поданьемъ отъ мене имѣней, съ кото­рыхъ бы сторожа, водлугъ давного звычаю, той церкви зъ скарбами, которыхъ, яко маю вѣдомость, же естъ много, бы­ ти мѣла, тогды нельза ми се то важить, абыхъ первѣй церковъ отъ вашмостя взялъ, а потомъ имѣнья; але нехай по­ѣду по тыхъ имѣньяхъ, подаючы ихъ его милости архіепископу, тамъ же взявшы певную вѣдомость о той сторо­жи, съ которого села передъ тымъ до тое церкви належала, тогды, взявшы стороясовъ, а оттуль ………. Светое СоФеи зъ скарбами зъ завѣданья отъ вашмостя вземшы, его милости архіе­пископу самому, або умоцованому его милости, подамъ; якожъ панъ намѣст­никъ напервѣй самъ черезъ себе подалъ мнѣ дворъ владычный, въ замку выш­немъ Полоцкомъ, пры церкви Светое СоФеи, который я зъ владзы пана намѣстниковой взявшы, будованье въ немъ на особливый реестръ списалъ есми; а потомъ, прыдавшы мнѣ панъ намѣст­никъ служебника своего Яна Миколае­вича и того жъ возного Деменьтея Про­коповича зъ ураду, до тыхъ имѣней ѣхати и его милости архіепископу са­мому, або умоцованому его милости, подавати позволилъ. 

А такъ я, заховуючыся водлугъ воли и листовного росказанья его королевское милости, а маючы пры собѣ того возного повѣтового зъ служебникомъ пана намѣстниковымъ, а земянина господарьского вое­водства Полоцького пана Семашка Яцьковича Телицу, и наперьвѣй въ року теперешнемъ осмдесятъ осмомъ, мѣсе­ца Декабра осмого дня, у Четьвергъ, прыѣхавшы до Фольварку владычнего, до двора, называемого Струненьского, у мили отъ Полоцка лежачого, будо­ванье въ немъ все и подданыхъ мено­вите, также шкоды ,………. раду Полоц­кого, по зостью небожчыка владыки починеные, на особливый реестръ по до­статку списалъ и сыну его милости архіепископа Полоцького, пану Богда­ну Терлецкому, за моцъю, ему отъ отца его даною, въ моцъ подалъ есми. А по­ томъ на завтрѣе у Пятницу, сегожъ мѣсеца Декабра девятого дня, прыѣхав­шы мнѣ до другого села владычнего, называемого Усвицы, подданыхъ всихъ меновите и шкоды ихъ на тотъ же реестръ списалъ и тому пану Богдану Терлецькому подалъ есми. Того-жъ дня прыѣхавшы мнѣ до Фольварку владычнего, называемого Теньченьского, а маючы пры собѣ того-жъ возного съ слу­жебникомъ пана намѣстниковымъ и вжо двухъ шляхтичовъ, то естъ: земянина господарьского воеводства Полоцького пана Григорья Шышку и того-жъ пана Семашка Телицу, будованье въ немъ все и подданыхъ меновите, также шко­ды ихъ, на тотъ же реестръ списавшы, тому-жъ умоцованому подалъ есми; вѣдь же тамъ у дворцы на Тетчы обачывшы не мало людей, зачынивсешыся имъ у свѣтлоцѣ, и послаломъ того возного и тыхъ двухъ шляхтичовъ, довѣдываючы се о тыхъ людехъ, для чого тутъ, у тотъ дворецъ зъѣхавшы се, прыбывають, а и впоминаючы тежъ оныхъ, абы вжо съ того дворца владычнего прочъ ѣхали, кгды-жъ вжо тотъ дворецъ его милости отцу владыцѣ Полоцькому подаломъ; которые, за наупомненьемъ возного, повѣдилъ одинъ зъ нихъ до возного, иже-мъ я есть урадникъ Черсвяцкій Станиславъ Мерла, и за росказаньемъ его милости пана намѣстника Полоцького, пана Якуба Семашка, и пана Миколая Подборского, писара кгродского Полоцького, увезанья въ тотъ дворецъ бороню и не поступуе, а ижъ вжо тотъ дворецъ и люди списавшы на инвентарь, подалемъ, а никто ми не боронилъ………………………то и самъ я мовилъ до нихъ, абы вжо тому дворцу Течьчы дали покой и съ тое свѣтлицы абы прочъ шли. А они тежъ, оповѣдавшы се возвожу и сторонѣ, вышедшы съ свѣтлицы, съ того дворца прочъ отъѣ­хали. А на третій день, тогожъ мѣсеца Декабра десятого дня, у Суботу, съ тымъ вознымъ и зъ стороною шляхтою верхопомененою, пры служебнику па­на намѣстниковомъ, прыѣхавшы мнѣ до четвертого села владычнего, назы­ваемого Завечелья, подданыхъ всихъ меновите и шкоды ихъ на тотъ же ре­естръ списавшы, тому умоцованому по­далъ есми, а того подаванья тыхъ Фоль­варковъ и селъ, меновите Струньни зъ населицами и зо всими прылеглостями, Течьча, Усвицы и Завечелья мнѣ на онъ часъ нихто не боронилъ. 

Того-жъ дня прыѣхавшы мнѣ и до пятого села владычнего, называемого Долецъ Вели­кихъ и Весницка, тамъ служебникъ па­на Ленарта Чернавского, служебника его милости пана воеводы Полоцько­го, Станиславъ Боровскій, показавши листъ отворыстый отъ пана своего, до него писаный, а мяючы пры собѣ мно­гихъ козаковъ Полоцькихъ съ розными бронями, до бою належачыми, именемъ пана своего мнѣ, посланцу короля, его милости, спротивился и тыхъ селъ верхопомененыхъ умоцованому архіеписко­па Полоцкого подавати и подданыхъ на реестръ списовати мнѣ не допустилъ; завинившы тымъ подданымъ подъ сто­ма копами грошей на пана воеводу По­лоцкого, срокго имъ грозилъ, абы ме­не, также и того, кому бымъ ихъ по­давати мѣлъ, послушни не были, повѣдаючи, же дей панъ мой мнѣ тыхъ селъ, которые я отъ него въ завѣданью своемъ маю, до горла боронити казалъ, и такъ дей того боронити буду. А затымъ я, освѣтчывшыся тымъ вознымъ и стороною шляхтою, людьми добрыми верхопоменеными, прочъ есми оттуль отъѣхалъ. 

А назавтрее у Недѣлю, сего-жъ мѣсеца Декабра одинадцатого дня, прыѣхавшы мнѣ до шостого имѣнья вла­дычнего, называемого мѣстечка Воро­нича, тамъ забѣгшы тотъ же верхопомененый Станиславъ Боровскій, тыми жъ словы именемъ пана своего мяѣ противилъсе и того имѣнья Воронича умоцованому архіепископа Полоцького подавати и подданыхъ списывати мнѣ не допустилъ, завинившы тымъ подданымъ подъ тисечма копами грошей на пана воеводу Полоцкого, срокго имъ грозилъ, абы мене и того, кому бымъ ихъ подавати мѣлъ, послушни не были, и повѣдалъ, ижъ дей и того имѣнья зъ росказанья пана моего модно боронити буду. Яко ягъ я оттуль, освѣтчывшыся вознымъ и стороною шляхтою, людьми добрыми верхопоменеными, прочъ есми отъѣхалъ. 

Того-жъ дня, прыѣхавши мнѣ до семого села владычнего, назы­ ваемого Уличъ, тамъ забѣгіпи тотъ же Станиславъ Боровскій, тыми жъ словы мовилъ и именемъ пана своего мнѣ спротивилъ се и того села Улича умо­цованому архіепископа Полоцкого по­дѣвати и подданыхъ списывати миѣ не допустилъ и повѣдилъ: не задавай дей вашмость, пане Кгодебскій, собѣ труд­ности и працы, абысь мѣлъ ѣздити до тыхъ селъ владычнихъ, меновите до Бѣлого, до Каменя Хороброва, до Кры­нокъ, до Деготокъ, до Оходна и до Зва­ного, бо дей конечно маючы росказанье пана своего, тыхъ всихъ селъ моцно бороню и боронити буду. Што все я тымъ вознымъ и стороною шляхтою, людьми добрыми, освѣтчалъ. 

А ижъ я взяломъ того певную вѣдомость, же сто­рожа до церкви Светое Софеи зъ села Дольца и Весницка, которыхъ мнѣ по­давати не допущоно и спротивено се, передъ тымъ здавна належала, съ тыхъ прычынъ, не маюцы певное сторожы до тое церкви зъ скарбами, на сей часъ зъ завѣданья пана намѣстникового брати и ее отпечатовати, такъ-же скарбовъ списовати, важыти ся не смѣлъ есми. 

А потомъ, прыѣхавшы мнѣ тутъ до Полоцка, року теперешнего осмдесятъ осмого, сего мѣсеца Декабра дванадцатого дня, у Понедѣлокъ, ходиломъ съ тымъ же вознымъ и съ тою сторо­ною, людьми добрыми вышейпоменемыми, до ратуша мѣста Полоцкого. Тамъ же кгды панъ Дмитръ Добрынскій, лент-войтъ Полоцкій, посполъ въ бурмистра­ми, райцами и лавниками мѣста По­лоцкого, яко дня судового на справахъ мѣстца свои засѣли, тогды, показавши я передъ ними листъ его королевское милости, пана моего милостивого, до мене писаный, домагаломъ ся, повѣдаючы тыми словы, ижъ маю того вѣдо­мость, же архіепископъ зошлый Полоц­кій, отецъ Ѳеофанъ Богданъ, мѣлъ пляцы свои тутъ у мѣстѣ Полоцкомъ на посадѣ Великомъ у Плиговкахъ, на ко­торыхъ пляцахъ люди побудовавшы се мѣшкаютъ и повинность всякую зошлому владыцѣ подвивали; а такъ, хотечы я и то зъ рамени его королевское милости теперешнему архіепископу По­лоцкому, его милости отцу Афтанасію Терлецкому, водлугъ листу его коро­левское милости, до мене писаного, по­дать; напоминаю и прошу васъ, абысте зъ владзы враду вашого тымъ мѣща­нокъ всимъ передо мною стати казали, абымъ ихъ на реестръ списалъ и то­му, кому то належитъ, подалъ. Тогды панъ лентвойтъ, обновивши се зо всею радою мѣстскою, на тые слова мои от­казъ чинечы, повѣдилъ тыми словы: не есть дей то у вѣдомости нашой, абы отецъ-владыка зошлый мѣщане свои и пляцы тутъ у мѣстѣ Полоцькомъ на посадѣ Великомъ у Плиговкахъ за жывота своего мѣти мѣлъ; про то дей и те­перь уступовать вашмостю не маемъ чого, бо дей не естъ есмо мощни мѣ­щанъ короля его милости ни………………. заводить, але дей его королевская ми­лость, вольно хотя и по………….. , мѣста Полоцкого кому хотечы отдать. Затымъ освѣтчывшыся я вознымъ и сто­роною, людьми добрыми прочь вами зъ ратуша отшолъ. А тотъ прывилей и листы короля его милости до пановъ шляхты, обывателей земли Полоцкое, до его милости пана воеводы Полоцького в до мене дворянина господарско­го писаные, для подпору нрава его ми­лости архіепископу Полоцькому, до рукъ сына его милости, верхопомененого пана Богдана Терлецького, отдалъ семи. И на томъ его милости отцу Афтанасію Терлецькому, архіепископу Полоцькему, черезъ сына его милости па­на Богдана Терлецького, далъ сесь мой увяжчий листъ, подъ моею печатью и подписокъ властное руки моее, такъ же подъ печатьми и подъ написаньемъ рукъ властныхъ возного повѣтового Деменьтея Прокоповича ж тыхъ пановъ шлях­ты, которые въ той справѣ при мнѣ были и того суть добре свѣдоми, то есть: пана Грыгорья Щышки и пана Семашка Телицы. Писанъ у Полоцку. Лѣта по Нароженью Сына Божего тисеча пять­ сотъ осмдесятъ осмого, мѣсеца Декаб­ра тринадцатого дня, водлугъ нового календару.

II. Реестръ, альбо инвентарь спи­санья добръ имѣней и селъ, владыче­ству Полоцкому прислухаючыхъ, у зем­ли Полоцкой лежачихъ, которые я Ѳе­доръ Кгодебскій, дворянинъ его коро­левское милости, велебному въ Бозѣ его милости архіепископу владыцѣ По­лоцкому, Витебскому и Мстиславскому, киръ Афтанасію Терлецкому, въ моцъ подалъ есми року теперешнего 1588, мѣсеца Декабра, розными днями.

То есть наперьвѣй дворъ владычній въ замку вышнемъ Полоцкомъ. Въ немъ будованья; свѣтлицы двѣ на подклѣ­ тахъ нанротивво себе, одна съ коморою, межи ними сѣнь, свѣтлица позем­ная, изба напротивко, межи ними сѣжь, свѣтлица на подъизбицы, напротивко клѣть на подклѣтѣ, межы ними сѣнь, спижарня на пивницы, стайня, броваръ старый, лазня, клѣточка малая.

Ку тому двору замковому фольварокъ у мили отъ Полоцка, прозываемый на Струньни. Въ немъ будованье: свѣтли­цы двѣ съ коморами напротивко себе, одна съ печью, а другая безъ печы, межы ними сѣнь непокрытая, изба че­лядная зъ сѣньми, одрына фороетеная, соломою покрытая, у гумнѣ осѣть одна. 

Въ томъ фольварку и въ гумнѣ збожья ни якого молочоного и не молочоного и на поляхъ засѣяного, также ни якое маетности, коней и быдла въ оборѣ нѣтъ ничого.

Церковь передъ дворомъ новопостановленая, заложенья Светого Пророка Ильи.

Подданые прыхожыя, до того фольварку прыслухаючые, меновите на поселицахъ:

• старецъ Васко Якимовичъ — дымъ 1,
• Стасъ Михновичъ— дымъ 1, 
• Петръ Яновичъ—дымъ 1, 
• Савиная вдо­ва, именемъ Овдотья—дымъ 1, 
• Андрей съ Хары(то)номъ— дымъ 1 , 
• подданый церковный Иван Безносичъ— дымъ 1, 
• Андрей Ильиничъ Барверъ— дымъ 1, 
• Бояринъ на Бѣлѣ Водѣ, Иванъ Грышковичъ—дымъ 1.

Повинность съ тыхъ подданыхъ за рокъ теперешній осмдесятъ осмый, мѣ­сеца Августа одинадцатаго дня, черезъ врадника зошлого архіепископа Полоц­кого отца Ѳеооана Богдана, черезъ Илью Туковича, выбраная, то есть: 

• старецъ Васко Якимовичъ далъ грошей копъ 2, 
• Стасъ Михновичъ далъ грошей коцу 1, 
• Петръ Яновичъ далъ грошей копу 1, 
• Савиная вдова, именемъ Овдотья, дала грошей копу 1, 
• Андрей съ Харытономъ дали грошей копу 1; 

чынить грошей копъ шесть.

По смерти отца владыки зошлого Ѳео­фана Богдана, намѣстникъ Полоцкій панъ Якубъ Семашко съ тыхъ же подданыхъ взялъ, то естъ: 

• у старца Вас­ка Якимовича грошей копъ 3, 
• у Стася Михновича взялъ грошей копъ 2, 
• у Петра Яновича взялъ грошей копъ 2, 
• у Савиное удовы грошей копъ 2, 
• у Ан­дрея и въ Харытона грошей копъ 2; 

чынить грошей копъ одинадцать.

А надто надъ повинность тыхъ подданыхъ, служебникъ пана Ленарта Чарнавского, Станиславъ Боровскій, прымушаючы ихъ до роботы незвыклое, о шкоду прыправовалъ, то естъ, черезъ шесть недѣль наймуючы роботниковъ, на кождую недѣлю по десети грошей даючы, на роботу до него посылали, въ чомъ они, кождый зъ нихъ, шкодують собѣ по копѣ грошей Литовскихъ; чы­нить грошей копъ пять.

Фольварокъ на Тетъчы: въ немъ будованья, то естъ: свѣтлица новая зъ сѣньми, свѣтлочокъ старыхъ также зъ сѣньми двѣ, одна безъ печы; клѣтей старыхъ двѣ; изба челядная зъ сѣньми непокрытыми; стайня безъ воротъ, со­ломою покрытая; лазня; гумно, въ ко­торомъ будованья большъ нѣтъ; только осѣть одна. Въ томъ фольварку и въ гумнѣ збожья ниякого молочоного и нее молочоного и на поляхъ засѣяного, также ни якое маетности, коней и быдла въ оборѣ нѣтъ ничого.

Церковъ передъ дворомъ заложенья Светого пророка Ильи; въ ней книгъ розныхъ личбою семъ; евангеліе сереб­ромъ оправное, позлотисто.

По смерти отца владыки, зошлого въ року теперешнемъ осмдесятъ осмомъ зостало збожья пашни дворное у гумнѣ не молочоного, то естъ: жыта копъ двад­цать, пшеницы копъ полтрети, ярицы копъ тры, ечменю копъ полторы, овса полкопы. Съ того вымолочено, за росказанъемъ пана нанѣстниковымъ, жы­ та бочокъ Полоцкихъ десеть, пшеницы осминокъ пять, ярицы бочка одна, еч­меню осминокъ чотыри.

Подданые прыхожые, ку тому фоль­варку прислухаючые: 

• Старецъ, найме Охромей Демидовичъ Краско — дымъ 1, 
• Андрей Олексѣевичъ—дымъ 1, 
• Лаврынъ Юрьковичъ — дымъ 1, 
• Ходоръ Семено­вич — дымъ 1, 
• Васко Семеновичъ — дымъ 1, 
• Ониско Готовчичъ— дымъ 1, 
• Софронъ Вородавичъ—дымъ 1, 
• Нестеръ Антиповичъ Бурый— дымъ 1, 
• Олексѣй Петровичъ— дымъ 1, 
• Карпъ Семено­вичъ — дымъ 1, 
• Иванъ Яковлевичъ — дымъ 1, 
• Иванъ Шершневичъ— дымъ 1, 
• Матѳей Ивановичъ Сопко— дымъ 1, 
• Мат­ѳей Ламачъ—дымъ 1, 
• Бирна Латышъ— дымъ 1, 
• Янко Белышевичъ — дымъ 1, 
• Янко на Веркудѣ — дымъ 1, 
• Курыло на Веркудѣ — дымъ 1, 
• Никипоръ Провада—огородникъ 1.

Повиность съ тыхъ подданыхъ на­мѣстникъ Полоцкій панъ Якубъ Се­машко, черезъ служебника своего Ива­на Поповку, выбралъ, то есть, зо всего села огуломъ взялъ доли мѣрою Полоц­кою зо всякого збожа, а меновите: Жита бочокъ 23. Ярицы бочокъ 9 и полѣ. Пшеницы бочокъ 5. Ечменю бочокъ 7 и полъ. Гречихи бочокъ б. Гороху бочка 1 и осминокъ 5. Конопель сѣменныхъ боч­ка 1.

Всего того збожья чинить бочокъ со­рокъ семъ и осминокъ двѣ, которое все збожье, такъ пашни дворное, яко и доль­ное, панъ- намѣстникъ, нѣтъ вѣдома, гдѣ обернулъ.

Ку тому фолварку Тетченскому село Усвица; въ немъ люди прихожые, ме­новите:

• Старецъ, на име Васко Ивано­вичъ Плѣшко—дымъ 1, 
• Карпъ Тимоѳе­евичъ — дымъ 1 , 
• Грыдько Ивановичъ Плѣшко — дымъ 1, 
• Купрыянъ Омельяновичъ—дымъ 1, 
• Охромей Марковичъ—дымъ 1, 
• Конашъ Ивановичъ— дымъ 1, 
• Кононъ Илимятичъ—дымъ 1, 
• Денисъ На­умовичъ—дымъ 1, 
• Яковъ Левоновичъ Та­раль— дымъ 1, 
• Иванъ Левоновичъ Та­раль— дымъ 1.

Повинность съ тыхъ подданыхъ за рокъ теперешній осмдесятъ осмый че­ резъ пана Марка Рыпинского, сына от­ца Владыки зошлого, еще пры животѣ отца его выбраная, то есть: 

• у Старца Васка Ивановича Плѣшка взялъ гро­шей 80, 
• у Карпа Тимоѳеевича взялъ гро­шей копъ 2 и грошей 10, 
• у Грыдька Ива­новича Плѣшка взялъ грошей копъ 2, 
• у Купрыяна Омельяновича взялъ гро­шей 50, 
• у Охромей Марковича взялъ грошей копъ 2 , 
• у Конаша Ивановича взялъ грошей 100, 
• у Дениса Наумовича взялъ грошей копу 1, 
• у Якова Левоновича Тараля взялъ грошей копъ пол­торы, 
• у Ивана Левоновича Тараля взялъ грошей копъ полторы; 

сумою чынить грошей копъ четырнадцать.

По смерти небожчыка отца владыки зошлого Ѳеофана Богдана, намѣстникъ Полоцкій панъ Якубъ Семашко знову съ тыхъ подданыхъ повинность въ ро­ ку теперешнемъ осмдесятъ осмомъ вы­биралъ, а меновите: 

• у старца Васка Ивановича Плѣшка взялъ грошей 80, 
• у Карпа Тимоѳеевича взялъ грошей копъ 2 и грошей 10, 
• у Грыдька Ивано­вича Плѣшка взялъ грошей копъ 2, 
• у Купрыяна Омельяновича взялъ грошей 50, 
• у Охромея Марковича взялъ гро­шей копъ 2, 
• у Конаша Ивановича взялъ грошей 100, 
• у Конова Климятинича взялъ грошей 24, 
• у Дениса Наумовича взялъ, грошей копу 1, 
• у Якова Левоно­вича Тараля взялъ грошей копъ полто­ры, 
• у Ивана Леоновича Тараля взялъ грошей копъ полторы; 

сумою чынить грошей копъ четырнадцать игрошей 24.

Иванъ Ларыоновичъ Поповка, прыѣхавши до села Усвицы, свовольне взялъ на тыхъ подданыхъ верхопомененыхъ зо всего села напервѣй грошей 72, жи­та мѣры Полоцкихъ—2, а въ тотъ часъ жито куповано въ торгу по сороку гро­шей; ечменю — полмѣры, который на тотъ часъ куповано мѣру по двадцать чотыры гроши; куровъ— 20, а самаго Васка Плѣшка безвинне до везенья у ланцугъ сажалъ, и зособна взялъ на немъ грошей 53.

Ку тому жъ двору Тетченскому село Завечелье; подданые того села, мено­вите: 

• старецъ Сидоръ Ивановичъ — дымъ 1, 
• Лука Кузминичъ—дымъ 1, 
• Вас­ко Даниловичъ—дымъ 1, 
• Коношъ Карниловичъ — дымъ 1, 
• Пилипъ Сопроновичъ—дымъ 1, 
• Иванъ Купрыяновичъ— дымъ 1, 
• Трухонъ Юдиничъ — дымъ 1, 
• Иванъ Довыдовичъ — дымъ 1, 
• Сидоръ Ходоровичъ—дымь 1, 
• Демешко Ходоро­вичъ—дымъ 1, 
• Грышко Корниловичъ— дымъ 1, 
• Омельянъ Кононовичъ—дымъ 1, 
• Карпъ Наплѣхъ—дымъ 1.

По смерти отца владыки зошлого Ѳео­фана Богдана, въ року теперешнемъ осмдесятъ осмомъ, намѣстникъ Полоц­кій Якубъ Семашка повинность съ тыхъ подданыхъ выбралъ; огуломъ зо всего села взялъ доли четвертое зо всякого збожья мѣрою Полоцкою, то естъ: ………

Шкоды тыхъ подданыхъ: напервѣй выбранье серебщызны: взялъ панъ на­мѣстникъ зо всего того села отъ сохъ семнадцати по грошей трынадцати и по два пѣнези; того сумою чынить гро­шей копъ тры и грошей сорокъ чоты­ры, пѣнязи чотыры. А потомъ — въ тый день съ тыхъ же подданыхъ, вмѣсто сторожовщызны, надъ звычай и повиность стародавную, взялъ грошей копъ двѣ и грошей чоты­ры; у старца Сидора Ивановича а у Луки Кузминича взялъ невинне овса бочки тры.

Церкви у Полоцку.

Церковь соборная Светое Софѣй въ замку вышнемъ Полоцкомъ.

Добра, на прыдѣлы въ той церкви наданые: 

къ прыдѣлу Светое Тройцы село въ Замшанѣхъ, наданое отъ великого кня­зя Полоцкого Андрея; человѣки тры пе­редъ тымъ было;— 

къ тому-жъ прыдѣлу село на Вшачы, веданное отъ великого князя Полоцко­го Семена; въ томъ селѣ передъ тымъ было чоловѣковъ пять;—: 

къ тому-жъ прыдѣлу у мѣстѣ По­ лоцкомъ на посадѣ Великомъ было пе­редъ тымъ дворищъ семъ, на которыхъ мѣщане мѣшкаючы, попу поземъ пла­чивали;— 

ку придѣлу Всихъ Светыхъ село у Кушликахъ, наданье земянъ Полоцкихъ пановъ Корсаковъ; въ томъ селѣ пе­редъ тымъ было чоловѣковъ семнадцать.

Церковь Светого Спаса у мѣстѣ По­лоцкомъ на посадѣ Великомъ.

Церковъ на томъ же посадѣ Рожества Христова. Къ той церкви село на Рожтовскомъ, чоловѣковъ четырнадцать , огородникъ одинъ; тое село на низъ рѣ­ки Двины.

Церковь Светого Козмы-Демъяна за­ложенья, въ мѣстѣ Полоцкомъ на по­садѣ за Полотою.

Ку той церкви, водлугъ давного па­данья, теперешній свещенникъ Давидъ Петровичъ держить село на Начы, въ которомъ передъ тымъ.было чоловѣковъ шесть; а иншое езоитомъ отдано.

Што тежъ, водлугъ писанья его ко­ролевское милости и тежъ водлугъ пи­санья его милости пана воеводы По­лоцкого, упоминаломъ ся у пана Якуба Семашка намѣстника Полоцкого, абы вен доходы за рокъ теперешній оемдесятъ осмый зъ имѣней владычнихъ, за вѣдомостью его выбраные. черезъ мене его милости архіепископу Полоцкому отдалъ; на то венъ намѣстникъ повѣ­далъ, инъ то все, штокольвекъ въ имѣней владычнихъ выбралъ, до пана воѣ­воды Полоцкого, пана своего, отослалъ.

А при томъ подаванью тыхъ имѣней былъ на онъ часъ при мнѣ возный вое­водства Полоцкого Дементей Прокопо­вичъ, отъ пана намѣстника зъ ураду прыданый; у фольварку Струньни и въ селѣ Усвицы былъ тежъ нри мнѣ эемянинъ господарскій воеводства Полоцко­го панъ Семашко Телица; а у фоль­варку Тетчы и въ селѣ Завечелью бы­ли вжо при мнѣ съ тымъ вознымъ два шляхтичы: земянинъ господарскій то­го жъ воеводства Полоцкого налъ Григорей Шишка и тотъ же панъ Семашко Телица. Которого подаванья черезъ ме­ не тыхъ добръ верхопомененыхъ, вла­дычеству Полоцкому належачыхъ, на сесь реестръ все меновите и по достат­ку списавшы, его милости архіеписко­пу Полоцкому киръ Афтанасію Терлецкому, черезъ сына его милости пана Богдана Терлецкого, подъ печатью и съ подписомъ руки моее властное, так­ же подъ печатьми и подъ написаньемъ рукъ властныхъ того возного и тыхъ пановъ шляхты верхопомененыхъ, далъ есми. Писанъ у Полоцку. Лѣта по Нароженью Хрыста Сына Божьего 1588, мѣсеца Декабря 13 дня.